ಸಕಲೇಶಪುರ: ಛಾವಣಿಗೆ ಶೀಟ್ ಆಳವಡಿಸುವ ಸಂದರ್ಭದಲ್ಲಿ ಆಕಸ್ಮಿಕವಾಗಿ ವಿದ್ಯುತ್ ಲೈನ್ ತಾಗಿ ಗಂಭೀರವಾಗಿ ಗಾಯಗೊಂಡ ಶಾಬಾಜ್ (21) ಎನ್ನುವ ಬಡ ಯುವಕನ ಚಿಕಿತ್ಸೆಗಾಗಿ ಕಾಂಗ್ರೆಸ್ ಮುಖಂಡ ಡಿ.ಮಲ್ಲೇಶ್ 15000ರೂಗಳನ್ನು ಯುವಕನ ಖಾತೆಗೆ ಹಾಕಿದ್ದಾರೆ.
ಘಟನೆ ಹಿನ್ನೆಲೆ: ಮಾಜಿ ಪುರಸಭ ಸದಸ್ಯ ವೆಂಕಟೇಶ್ ಅವರಿಗೆ ಸೇರಿದ ಕಟ್ಟಡದ ಕೆಲಸವನ್ನು ಕಳೆದ ಕೆಲವು ದಿನಗಳಿಂದ ಮಾಡುತ್ತಿದ್ದು ಅಂತಿಮ ಹಂತದ ಕೆಲಸವನ್ನು ಮುಗಿಸಲು ಕಬ್ಬಿಣದ ಶೀಟ್ ಛಾವಣಿಯ ಮೇಲೇರಿಸುವ ಸಂದರ್ಭದಲ್ಲಿ ಲೈನ್ ಕೇಬಲ್ ಗೆ ಶೀಟ್ ತಗುಲಿದೆ. ಶಾಕ್‌ನಿಂದ ಶಬಾಝ್ ಕೆಳಕ್ಕೆ ಬಿದ್ದು ಗಾಯಗೊಂಡಿದ್ದಾನೆ. ತಕ್ಷಣವೇ ಸ್ಥಳೀಯರು ಆತನನ್ನು ಆಸ್ಪತ್ರೆಗೆ ದಾಖಲಿಸಿದ್ದರು.. ಗಂಭೀರವಾಗಿ ಗಾಯಗೊಂಡಿದ್ದರಿಂದ ಯುವಕನ ಎರಡು ಕೈ, ಹೊಟ್ಟೆ ಹಾಗೂ ಸೊಂಟದ ಭಾಗ ಸುಟ್ಟು ಹೋಗಿದೆ. ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಪ್ರಾಥಮಿಕ ಚಿಕಿತ್ಸೆ ಕೊಡಿಸಿ, ತದನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಮಂಗಳೂರು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಯುವಕನ ಬಳಿ ಹಣವಿಲ್ಲದೆ ಚಿಕಿತ್ಸೆಗಾಗಿ ಪರದಾಡಿದ್ದು ಡಿ.ಮಲ್ಲೇಶ್ ರವರ ಅರಿವಿಗೆ ಬಂದ ಹಿನ್ನೆಲೆಯಲ್ಲಿ ಸಹಾಯ ಹಸ್ತ ಚಾಚಿದ್ದು ಸಾರ್ವಜನಿಕರ ಪ್ರಶಂಸೆಗೆ ಪಾತ್ರವಾಗಿದೆ.
