ಸಕಲೇಶಪುರ: ಕುದ್ರು ಚಲನಚಿತ್ರಕ್ಕೆ ಪ್ರೇಕ್ಷಕರಿಂದ ಉತ್ತಮವಾದ ಪ್ರತಿಕ್ರಿಯೆ ಬರುತ್ತಿರುವುದು ಸಂತೋಷದ ವಿಷಯವಾಗಿದೆ ಎಂದು ಕುದ್ರು ಚಲನಚಿತ್ರದ ನಟಿ ಡಯಾನ ಡಿಸೋಜಾ ಹೇಳಿದರು.
ಪಟ್ಟಣದ ನಟಿ ಡಯಾನ ಡಿಸೋಜಾ ನಟಿಸಿರುವ ಕುದ್ರು ಚಲನಚಿತ್ರದ ಬಿಡುಗಡೆ ಹಿನ್ನೆಲೆಯಲ್ಲಿ ಪಟ್ಟಣದ ತೇಜಸ್ವಿ ಚಿತ್ರಮಂದಿರದಲ್ಲಿ ನಡೆದ ಕಾರ್ಯಕ್ರಮವನ್ನು ದೀಪ ಬೆಳಗಿಸಿ ಹಾಗೂ ಕೇಕ್ ಕತ್ತರಿಸುವ ಮುಖಾಂತರ ಉದ್ಘಾಟಿಸಿ ಮಾತನಾಡಿ ಮನೆಮಗಳು ನಟಿಸಿರುವ ಚಲನಚಿತ್ರ ನೋಡಲು ಇಷ್ಟೊಂದು ಜನ ಆಗಮಿಸಿರುವುದಕ್ಕೆ ನನಗೆ ತುಂಬಾ ಸಂತೋಷವಾಗಿದೆ. ಚಿತ್ರ ತಂಡದವರೆಲ್ಲಾ ಚಿತ್ರದ ಪ್ರಚಾರ ಕಾರ್ಯಕ್ರಮದಲ್ಲಿ ಭಾಗವಹಿಸಬೇಕಾಗಿತ್ತು. ಆದರೆ ಬೇರೆ ಬೇರೆ ಕಡೆ ಪ್ರಚಾರ ಮಾಡಲು ಹೋಗಿರುವುದರಿಂದ ಎಲ್ಲಾರು ಇಲ್ಲಿ ಬರಲು ಸಾಧ್ಯವಾಗಿಲ್ಲ. ನನ್ನ ನಟನೆಯ ಚಿತ್ರವನ್ನು ನನ್ನೂರಿನಲ್ಲೆ ನಮ್ಮೂರಿನ ಜನರ ಜೊತೆ ತೇಜಸ್ವಿ ಚಿತ್ರಮಂದಿರದಲ್ಲಿ ಬಿಡುಗಡೆಯಾಗಿ ವೀಕ್ಷಿಸುವುದು ನನ್ನ ಭಾಗ್ಯ, ಕುದ್ರು ಚಲನಚಿತ್ರ ಒಂದು ವಿಶೇಷ ಪ್ರಯತ್ನವಾಗಿದೆ. ನೀವೆಲ್ಲಾರು ಚಲನಚಿತ್ರ ವೀಕ್ಷಿಸಿ ನಿಮ್ಮೂರಿನ ನಟಿಯನ್ನು ಬೆಳೆಸಿ ಎಂದರು.
ಪರಿಸರಪ್ರೇಮಿ ಇತಿಹಾಸ್ ಮಾತನಾಡಿ ಕುದ್ರು ಚಲನಚಿತ್ರದ ಬಿಡುಗಡೆ ಅಂಗವಾಗಿ ಗಿಡಗಳನ್ನು ಗಣ್ಯರಿಗೆ ನೀಡಲಾಗುತ್ತಿದೆ. ಪರಿಸರವನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ ಈ ಚಿತ್ರ ತಂಡದವರು ಮಾಡುತ್ತಿರುವುದು ಉತ್ತಮ ಪ್ರಯತ್ನವಾಗಿದೆ ಎಂದರು.
ಕಾರ್ಯಕ್ರಮದಲ್ಲಿ ಪುರಸಭಾ ಸದಸ್ಯ ಪ್ರಜ್ವಲ್, ಗಾಯತ್ರಿ ಚಿತ್ರಮಂದಿರದ ಮಾಲಿಕ ಜೈಮಾರುತಿ ದೇವರಾಜ್, ಕೊಂಕಣಿ ಸಂಘದ ಅಧ್ಯಕ್ಷ ಪ್ರದೀಪ್ ಡಿಸೋಜಾ, ನಟಿ ಡಯಾನ ತಂದೆ ಥಾಮಸ್ ಡಿಸೋಜಾ, ತಾಯಿ ಮೋನಿಕಾ, ಗಿರೀಶ್ ಕೆ.ಬಿ ಕ್ರೈಸ್ತ ಮುಖಂಡ ರಾಕೇಶ್ ಮುಂತಾದವರು ಹಾಜರಿದ್ದರು.
